کچھ کم نہیں ندامت پنہاں خطا کے بعد

کچھ کم نہیں ندامت پنہاں خطا کے بعد

بے سود ہے ہر ایک سزا اس سزا کے بعد

فکر معاش اہل محبت نہ کیجیے

کھانے کو خون دل ہے فریب وفا کے بعد

اس دور میں کرم کا روادار کون ہے

پچتائے کیوں کوئی ستم ناروا کے بعد

شاہوں کے ساتھ یہ بھی ہے تقدیر کا مذاق

رزق ہما ہوں سایۂ بال ہما کے بعد

اس کا علاج کیا ہے بہ جز ترک مدعا

جب سامنا ہو یاس کا ہر مدعا کے بعد

تاریخ اس کو بھول سکے گی نہ اے وطن

آئے گا ذکر کرب ترا کربلا کے بعد

بے مہری بتاں سے خدا یاد آ گیا

محرومؔ کس کو یاد کرو گے خدا کے بعد