kuchh KHayal-e-dil-e-hassas meri jaan rakhna

kuchh ḳhayāl-e-dil-e-hassās mirī jaañ rakhnā

aa.ina TuuT bhī saktā hai ye imkāñ rakhnā

ho ke tahlīl-e-vafā aks ko pinhāñ rakhnā

rū-ba-rū zaat ke ā.īne ko hairāñ rakhnā

ghar se mānūs jo ho jaa.e parāyā kaisā

jo base dil meñ use qurb-e-rag-e-jāñ rakhnā

dukh ke kāñToñ pe sajā lenā tabassum ke gulāb

apnī hastī ko hama-rang gulistāñ rakhnā

har na.e gaam pe tajdīd-e-vafā kar lenā

azm-e-nau se safar-e-zīst ko āsāñ rakhnā

zarf ḳhālī ho to fariyād-kunāñ hotā hai

dil meñ kuchh hasrat-o-ummīd ke sāmāñ rakhnā

tīrgī ziist ke ādāb miTā detī hai

dil ko dar aa.e hue dard se tābāñ rakhnā

vahm hai vaj.h-e-parāganda-e-ḳhātir 'shāriq'

vahm se ḳhud ko bahar-hāl gurezāñ rakhnā

kuchh KHayal-e-dil-e-hassas meri jaan rakhna

aaina TuT bhi sakta hai ye imkan rakhna

ho ke tahlil-e-wafa aks ko pinhan rakhna

ru-ba-ru zat ke aaine ko hairan rakhna

ghar se manus jo ho jae paraya kaisa

jo base dil mein use qurb-e-rag-e-jaan rakhna

dukh ke kanTon pe saja lena tabassum ke gulab

apni hasti ko hama-rang gulistan rakhna

har nae gam pe tajdid-e-wafa kar lena

azm-e-nau se safar-e-zist ko aasan rakhna

zarf KHali ho to fariyaad-kunan hota hai

dil mein kuchh hasrat-o-ummid ke saman rakhna

tirgi zist ke aadab miTa deti hai

dil ko dar aae hue dard se taban rakhna

wahm hai wajh-e-paraganda-e-KHatir 'shaariq'

wahm se KHud ko bahar-haal gurezan rakhna