kuchh khilaune kabhi aangan mein dikhai dete

kuchh khilaune kabhī āñgan meñ dikhā.ī dete

kaash ham bhī kisī bachche ko miThā.ī dete

suune panghaT kā koī dard-bharā giit the ham

shahr ke shor meñ kyā tujh ko sunā.ī dete

kahīñ be-nūr na ho jaa.eñ vo būḌhī āñkheñ

ghar meñ Darte the ḳhabar bhī mire bhaa.ī dete

saath rahne se bhī khil jaate haiñ rishtoñ ke kañval

bandisheñ rone lagīñ mujh ko rihā.ī dete

in sisakte hue rishtoñ ke kahāñ the qaa.il

varna ham aur tujhe dāġh-e-judā.ī dete

siskiyāñ us kī na dekhī ga.iiñ mujh se 'ra.anā'

ro paḌā maiñ bhī use pahlī kamā.ī dete

kuchh khilaune kabhi aangan mein dikhai dete

kash hum bhi kisi bachche ko miThai dete

sune panghaT ka koi dard-bhara git the hum

shahr ke shor mein kya tujh ko sunai dete

kahin be-nur na ho jaen wo buDhi aankhen

ghar mein Darte the KHabar bhi mere bhai dete

sath rahne se bhi khil jate hain rishton ke kanwal

bandishen rone lagin mujh ko rihai dete

in sisakte hue rishton ke kahan the qail

warna hum aur tujhe dagh-e-judai dete

siskiyan us ki na dekhi gain mujh se 'rana'

ro paDa main bhi use pahli kamai dete