kuchh ko ye zid hai ki hum usko yahin dekhenge

kuchh ko ye zid hai ki ham us ko yahīñ dekheñge

kuchh ye kahte haiñ chalo chhoḌo vahīñ dekheñge

qistoñ qistoñ meñ nihāreñge sarāpā terā

ek hī baar meñ ham puurā nahīñ dekheñge

ab ke paayā hai tumheñ pichhle baras se bhī hasīñ

ya.anī ham agle baras aur hasīñ dekheñge

kabhī barchhī kī anī lāsh-e-javāñ girtā alam

ham jarī haiñ to ye manzar bhī hamīñ dekheñge

ham se tai hogā zamāne meñ bulandī kā vaqār

nok-e-neza se bhī ham nīche nahīñ dekheñge

kab talak tū bhī hameñ girya-kunāñ dekhegā

kab talak ham bhī tujhe taḳht-nashīñ dekheñge

bhej de ab to use jis kā kiyā hai va.ada

yā abhī aur sitam ahl-e-zamīñ dekheñge

kuchh ko ye zid hai ki hum us ko yahin dekhenge

kuchh ye kahte hain chalo chhoDo wahin dekhenge

qiston qiston mein nihaarenge sarapa tera

ek hi bar mein hum pura nahin dekhenge

ab ke paya hai tumhein pichhle baras se bhi hasin

yani hum agle baras aur hasin dekhenge

kabhi barchhi ki ani lash-e-jawan girta alam

hum jari hain to ye manzar bhi hamin dekhenge

hum se tai hoga zamane mein bulandi ka waqar

nok-e-neza se bhi hum niche nahin dekhenge

kab talak tu bhi hamein girya-kunan dekhega

kab talak hum bhi tujhe taKHt-nashin dekhenge

bhej de ab to use jis ka kiya hai wada

ya abhi aur sitam ahl-e-zamin dekhenge