kuchh log jo hasil hon ganwae nahin jate

kuchh log jo hāsil hoñ gañvā.e nahīñ jaate

is tarah ḳhazāne to luTā.e nahīñ jaate

amrit tirī bātoñ kā hī kaafī hai ajal ko

yuuñ zahr pyāle to pilā.e nahīñ jaate

kyoñ ham se hue jaate ho anjān achānak

is tarah to paimān bhulā.e nahīñ jaate

jaise tirī yādoñ ko sajāyā hai qafas meñ

aise to shabistāñ bhī sajā.e nahīñ jaate

rahte haiñ kasak ban ke tirī yaad ke jugnū

is dil se tirī yaad ke saa.e nahīñ jaate

koī use batlā.e ki aa jaa.e vagarna

ab ham se diye aur jalā.e nahīñ jaate

jis tarah dil-e-soḳhta ko maiñ ne sulāyā

us tarah to bachche bhī sulā.e nahīñ jaate

'shākir' maiñ vo andāz-e-jafā bhuul to jā.ūñ

jo naqsh haiñ dil par vo miTā.e nahīñ jaate

kuchh log jo hasil hon ganwae nahin jate

is tarah KHazane to luTae nahin jate

amrit teri baaton ka hi kafi hai ajal ko

yun zahr pyale to pilae nahin jate

kyon hum se hue jate ho anjaan achanak

is tarah to paiman bhulae nahin jate

jaise teri yaadon ko sajaya hai qafas mein

aise to shabistan bhi sajae nahin jate

rahte hain kasak ban ke teri yaad ke jugnu

is dil se teri yaad ke sae nahin jate

koi use batlae ki aa jae wagarna

ab hum se diye aur jalae nahin jate

jis tarah dil-e-soKHta ko main ne sulaya

us tarah to bachche bhi sulae nahin jate

'shakir' main wo andaz-e-jafa bhul to jaun

jo naqsh hain dil par wo miTae nahin jate