kuchh log jo naKHwat se mujhe ghur rahe hain

kuchh log jo naḳhvat se mujhe ghuur rahe haiñ

māhaul se shāyad ye bahut duur rahe haiñ

kyā kahiye ki kyā ho gayā is shahr kā aalam

jis shahr meñ ulfat ke bhī dastūr rahe haiñ

majbūr kise kahte haiñ ye kaun batā.e

pūchhe koī un se ki jo majbūr rahe haiñ

kuchh log sar-e-dār rahe hoñ to rahe hoñ

ham haiñ ki bahar-taur sar-e-tūr rahe haiñ

hañste hue chehroñ pe na jā sīnoñ meñ un ke

hālāt ke Takrāv se nāsūr rahe haiñ

ai shaiḳh ġhanīmat hai agar ham ko samajh lo

ham mansab-e-tasdīq pe māmūr rahe haiñ

ik tum ki ḳhudā.ī ke bhī da.ave rahe tum ko

ik ham ki is iqrār se ma.azūr rahe haiñ

sukkān-e-haram kyā haiñ ye mujh se koī pūchhe

allāh ke ghar meñ bhī ye maġhrūr rahe haiñ

ehsān baḌā bojh hai is ḳhauf se 'yāvar'

dīvār ke saa.e se bhī ham duur rahe haiñ

kuchh log jo naKHwat se mujhe ghur rahe hain

mahaul se shayad ye bahut dur rahe hain

kya kahiye ki kya ho gaya is shahr ka aalam

jis shahr mein ulfat ke bhi dastur rahe hain

majbur kise kahte hain ye kaun batae

puchhe koi un se ki jo majbur rahe hain

kuchh log sar-e-dar rahe hon to rahe hon

hum hain ki bahar-taur sar-e-tur rahe hain

hanste hue chehron pe na ja sinon mein un ke

haalat ke Takraw se nasur rahe hain

ai shaiKH ghanimat hai agar hum ko samajh lo

hum mansab-e-tasdiq pe mamur rahe hain

ek tum ki KHudai ke bhi dawe rahe tum ko

ek hum ki is iqrar se mazur rahe hain

sukkan-e-haram kya hain ye mujh se koi puchhe

allah ke ghar mein bhi ye maghrur rahe hain

ehsan baDa bojh hai is KHauf se 'yawar'

diwar ke sae se bhi hum dur rahe hain