kuchh log sirf hum ko satane mein rah gae

kuchh log sirf ham ko satāne meñ rah ga.e

aur ham ta.alluqāt nibhāne meñ rah ga.e

ham ne to mushkilāt meñ manzil talāsh kī

ik vo hai jo ki ham ko girāne meñ rah ga.e

dil tak kisī ke jaanā hai par jaa.eñ kis tarah

jaanā to chāhte the na jaane meñ rah ga.e

apne atiit se kiyā samjhautā na kabhī

kuchh yādgār pal bhī bhulāne meñ rah ga.e

ham ne to dard kī na.ī rachnā.eñ likh bhī diiñ

kuchh log sirf khāne kamāne meñ rah ga.e

gar tū ḳhudā nahīñ hai to itnā ghamanD kyoñ

ham us ko ye bhī yaad dilāne meñ rah ga.e

us ne hamāre paañv meñ zanjīr Daal dī

ham us se sirf haath milāne meñ rah ga.e

jin ke liye havan meñ huī saarī zindagī

vo log bas mujhī ko jalāne meñ rah ga.e

kuchh aur un se ho na sakā 'anjanā' to phir

vo mujh ko apnā ro.ab dikhāne meñ rah ga.e

kuchh log sirf hum ko satane mein rah gae

aur hum talluqat nibhane mein rah gae

hum ne to mushkilat mein manzil talash ki

ek wo hai jo ki hum ko girane mein rah gae

dil tak kisi ke jaana hai par jaen kis tarah

jaana to chahte the na jaane mein rah gae

apne atit se kiya samjhauta na kabhi

kuchh yaadgar pal bhi bhulane mein rah gae

hum ne to dard ki nai rachnaen likh bhi din

kuchh log sirf khane kamane mein rah gae

gar tu KHuda nahin hai to itna ghamanD kyon

hum us ko ye bhi yaad dilane mein rah gae

us ne hamare panw mein zanjir Dal di

hum us se sirf hath milane mein rah gae

jin ke liye hawan mein hui sari zindagi

wo log bas mujhi ko jalane mein rah gae

kuchh aur un se ho na saka 'anjana' to phir

wo mujh ko apna roab dikhane mein rah gae