kuchh lutf KHamoshi mein na aahon mein maza hai

kuchh lutf ḳhamoshī meñ na aahoñ meñ mazā hai

be-kaifī-e-dil in dinoñ kuchh had se sivā hai

be-ḳhud kiye rahtī hai tasavvur kī fazā meñ

apnī shab-e-tanhā.ī kā aalam hī judā hai

ik rabt-e-mohabbat hī kā ehsās hai dil meñ

kuchh aur na ehsās-e-jafā hai na vafā hai

ai dost maiñ kyā mahviyat-e-dil ko chhupā.ūñ

jab husn-e-tasavvur hī tirā hosh-rubā hai

ai aarfī hai rāh-e-mohabbat bhī ajab raah

rahbar hai jahāñ koī na manzil kā patā hai

kuchh lutf KHamoshi mein na aahon mein maza hai

be-kaifi-e-dil in dinon kuchh had se siwa hai

be-KHud kiye rahti hai tasawwur ki faza mein

apni shab-e-tanhai ka aalam hi juda hai

ek rabt-e-mohabbat hi ka ehsas hai dil mein

kuchh aur na ehsas-e-jafa hai na wafa hai

ai dost main kya mahwiyat-e-dil ko chhupaun

jab husn-e-tasawwur hi tera hosh-ruba hai

ai aarfi hai rah-e-mohabbat bhi ajab rah

rahbar hai jahan koi na manzil ka pata hai