kuchh mujhe kah ke na kahwaiye aap

kuchh mujhe kah ke na kahvā.iye aap

bas zabāñ merī na khulvā.iye aap

dosh par aur na bhārī ho jaa.e

mere sar kī na qasam khā.iye aap

bazm-e-nāz us kī hai ai hazrat-e-dil

paañv apne bhī na phailā.iye aap

ġhair ke shikve na pūchho shab-e-vasl

pichhle murde na ukhaḌvā.iye aap

log jāneñge tumhārā āshiq

maiñ agar aa.uuñ to sharmā.iye aap

kuchh patā merā batā dījiyegā

kuchh ḳhabar merī agar pā.iye aap

saath mere na koī chīḳh uThe

mujh ko mahfil se na uThvā.iye aap

jaate jaate kahīñ aġhyār ke ghar

kaash raste hī meñ mil jā.iye aap

ek dam us ko bhulā kar 'sālik'

jī kisī tarah to bahlā.iye aap

kuchh mujhe kah ke na kahwaiye aap

bas zaban meri na khulwaiye aap

dosh par aur na bhaari ho jae

mere sar ki na qasam khaiye aap

bazm-e-naz us ki hai ai hazrat-e-dil

panw apne bhi na phailaiye aap

ghair ke shikwe na puchho shab-e-wasl

pichhle murde na ukhaDwaiye aap

log jaanenge tumhaara aashiq

main agar aaun to sharmaiye aap

kuchh pata mera bata dijiyega

kuchh KHabar meri agar paiye aap

sath mere na koi chiKH uThe

mujh ko mahfil se na uThwaiye aap

jate jate kahin aghyar ke ghar

kash raste hi mein mil jaiye aap

ek dam us ko bhula kar 'salik'

ji kisi tarah to bahlaiye aap