kuchh na kuchh ho to sahi anjuman-arai ko

kuchh na kuchh ho to sahī anjuman-ārā.ī ko

apne hī ḳhuuñ se firozāñ karo tanhā.ī ko

ab ye aalam hai ki biitī huī barsātoñ kī

apne hī jism se bū aatī hai saudā.ī ko

paas pahuñche to bikhar jā.egā afsūñ saarā

duur hī duur se sunte raho shahnā.ī ko

kisī zindāñ kī taraf aaj havā ke jhoñke

pā-ba-zanjīr liye jaate haiñ saudā.ī ko

kis meñ tāqat hai ki gulshan meñ muqayyad kar le

is qadar duur se aa.ī huī purvā.ī ko

vo dahaktā huā paikar vo achhūtī rañgat

chuum le jaise koī lāla-e-sahrā.ī ko

bahut āzurda ho 'shahzād' to khul kar ro lo

hijr kī raat hai chhoḌo bhī shakebā.ī ko

kuchh na kuchh ho to sahi anjuman-arai ko

apne hi KHun se firozan karo tanhai ko

ab ye aalam hai ki biti hui barsaton ki

apne hi jism se bu aati hai saudai ko

pas pahunche to bikhar jaega afsun sara

dur hi dur se sunte raho shahnai ko

kisi zindan ki taraf aaj hawa ke jhonke

pa-ba-zanjir liye jate hain saudai ko

kis mein taqat hai ki gulshan mein muqayyad kar le

is qadar dur se aai hui purwai ko

wo dahakta hua paikar wo achhuti rangat

chum le jaise koi lala-e-sahrai ko

bahut aazurda ho 'shahzad' to khul kar ro lo

hijr ki raat hai chhoDo bhi shakebai ko