kuchh na kuchh is sar-zamin par nagahan hona hi tha

kuchh na kuchh is sar-zamīñ par nāgahāñ honā hī thā

un ko mujh se bhī ḳhafā ai mehrbāñ honā hī thā

chhoḌ jā.egī hamārī zindagī mā'lūm thā

fāsla us ke hamāre darmiyāñ honā hī thā

lā.eñge ab dekhiye ilzām kyā ham par nayā

imtihāñ ke baa'd bhī to imtihāñ honā hī thā

kuchh samundar the hamāre chashm-e-tar meñ chhup ga.e

kuchh to aañsū the jinheñ āb-e-ravāñ honā hī thā

tishnagī ai tishnagī is dhuup meñ ham kyā kareñ

qatra qatra ḳhūn-e-dil se nīm-jāñ honā hī thā

jo sitāre the hamārī gardish-e-ayyām ke

un ko to āḳhir hamārī kahkashāñ honā hī thā

shūmī-e-qismat ki saare shahr meñ badnām haiñ

jo bhī kuchh achchhā kiyā vo rā.egāñ honā hī thā

sun ke vo qisse hamāre chup ke chup hī rah ga.e

phir bhī 'āriz the ki un ko gulsitāñ honā hī thā

ai dil-e-nādāñ tujhe bhī fikr hai kis baat kī

tujh ko bhī ik din kisī kī dāstāñ honā hī thā

ham ne khaa.e haiñ hazāroñ zaḳhm apnī jaan par

'barham' un ko phir bhī ham se bad-gumāñ honā hī thā

kuchh na kuchh is sar-zamin par nagahan hona hi tha

un ko mujh se bhi KHafa ai mehrban hona hi tha

chhoD jaegi hamari zindagi ma'lum tha

fasla us ke hamare darmiyan hona hi tha

laenge ab dekhiye ilzam kya hum par naya

imtihan ke ba'd bhi to imtihan hona hi tha

kuchh samundar the hamare chashm-e-tar mein chhup gae

kuchh to aansu the jinhen aab-e-rawan hona hi tha

tishnagi ai tishnagi is dhup mein hum kya karen

qatra qatra KHun-e-dil se nim-jaan hona hi tha

jo sitare the hamari gardish-e-ayyam ke

un ko to aaKHir hamari kahkashan hona hi tha

shumi-e-qismat ki sare shahr mein badnam hain

jo bhi kuchh achchha kiya wo raegan hona hi tha

sun ke wo qisse hamare chup ke chup hi rah gae

phir bhi 'ariz the ki un ko gulsitan hona hi tha

ai dil-e-nadan tujhe bhi fikr hai kis baat ki

tujh ko bhi ek din kisi ki dastan hona hi tha

hum ne khae hain hazaron zaKHm apni jaan par

'barham' un ko phir bhi hum se bad-guman hona hi tha