kuchh na kuchh ishq ki tasir ka iqrar to hai

kuchh na kuchh ishq kī tāsīr kā iqrār to hai

us kā ilzām-e-taġhāful pe kuchh inkār to hai

har fareb-e-ġham-e-duniyā se ḳhabar-dār to hai

terā dīvāna kisī kaam meñ hushyār to hai

dekh lete haiñ sabhī kuchh tire mushtāq-e-jamāl

ḳhair dīdār na ho hasrat-e-dīdār to hai

ma.arke sar hoñ usī barq-e-nazar se ai husn

ye chamaktī huī chaltī hui talvār to hai

sar paTakne ko paTaktā hai magar ruk ruk kar

tere vahshī ko ḳhayāl-e-dar-o-dīvār to hai

ishq kā shikva-e-bejā bhī na be-kār gayā

na sahī jaur magar jaur kā iqrār to hai

tujh se himmat to paḌī ishq ko kuchh kahne kī

ḳhair shikva na sahī shukr kā iz.hār to hai

is meñ bhī rābta-e-ḳhās kī miltī hai jhalak

ḳhair iqrār-e-mohabbat na ho inkār to hai

kyuuñ jhapak jaatī hai rah rah ke tirī barq-e-nigāh

ye jhijak kis liye ik kushta-e-dīdār to hai

ka.ī unvān haiñ mamnūn-e-karam karne ke

ishq meñ kuchh na sahī zindagī be-kār to hai

sahar-o-shām sar-e-anjuman-e-nāz na ho

jalva-e-husn to hai ishq-e-siyahkār to hai

chauñk uThte haiñ 'firāq' aate hī us shoḳh kā naam

kuchh sarāsīmgī-e-ishq kā iqrār to hai

kuchh na kuchh ishq ki tasir ka iqrar to hai

us ka ilzam-e-taghaful pe kuchh inkar to hai

har fareb-e-gham-e-duniya se KHabar-dar to hai

tera diwana kisi kaam mein hushyar to hai

dekh lete hain sabhi kuchh tere mushtaq-e-jamal

KHair didar na ho hasrat-e-didar to hai

marke sar hon usi barq-e-nazar se ai husn

ye chamakti hui chalti hui talwar to hai

sar paTakne ko paTakta hai magar ruk ruk kar

tere wahshi ko KHayal-e-dar-o-diwar to hai

ishq ka shikwa-e-beja bhi na be-kar gaya

na sahi jaur magar jaur ka iqrar to hai

tujh se himmat to paDi ishq ko kuchh kahne ki

KHair shikwa na sahi shukr ka izhaar to hai

is mein bhi rabta-e-KHas ki milti hai jhalak

KHair iqrar-e-mohabbat na ho inkar to hai

kyun jhapak jati hai rah rah ke teri barq-e-nigah

ye jhijak kis liye ek kushta-e-didar to hai

kai unwan hain mamnun-e-karam karne ke

ishq mein kuchh na sahi zindagi be-kar to hai

sahar-o-sham sar-e-anjuman-e-naz na ho

jalwa-e-husn to hai ishq-e-siyahkar to hai

chaunk uThte hain 'firaq' aate hi us shoKH ka nam

kuchh sarasimgi-e-ishq ka iqrar to hai