kuchh na kuchh silsila hi ban jata

kuchh na kuchh silsila hī ban jaatā

ret par naqsh-e-pā hī ban jaatā

kis ne kāġhaz pe likh diyā mujh ko

is se behtar sadā hī ban jaatā

zindagī kī radīf mushkil thī

maiñ faqat qāfiya hī ban jaatā

ashk kuchh der ko hī tham jaate

kaam bigḌā huā hī ban jaatā

kashtiyāñ to ḳhudā chalātā hai

kaash maiñ nāḳhudā hī ban jaatā

kyā milā mujh ko nekiyoñ kā sila

achchhā hotā burā hī ban jaatā

manziloñ kī kise tamannā thī

bhiiḌ meñ rāstā hī ban jaatā

ab to bas ye havā kī koshish hai

ek bādal ghanā hī ban jaatā

maiñ bhī chehra agar haTā letā

aa.ina aa.inā hī ban jaatā

ham zarā aur sabr kar lete

dard shāyad davā hī ban jaatā

ham se dīvāne gar nahīñ hote

shahr ye hādsa hī ban jaatā

kuchh na kuchh silsila hi ban jata

ret par naqsh-e-pa hi ban jata

kis ne kaghaz pe likh diya mujh ko

is se behtar sada hi ban jata

zindagi ki radif mushkil thi

main faqat qafiya hi ban jata

ashk kuchh der ko hi tham jate

kaam bigDa hua hi ban jata

kashtiyan to KHuda chalata hai

kash main naKHuda hi ban jata

kya mila mujh ko nekiyon ka sila

achchha hota bura hi ban jata

manzilon ki kise tamanna thi

bhiD mein rasta hi ban jata

ab to bas ye hawa ki koshish hai

ek baadal ghana hi ban jata

main bhi chehra agar haTa leta

aaina aaina hi ban jata

hum zara aur sabr kar lete

dard shayad dawa hi ban jata

hum se diwane gar nahin hote

shahr ye hadsa hi ban jata