kuchh nahin hai to ye andesha ye Dar kaisa hai

kuchh nahīñ hai to ye andesha ye Dar kaisā hai

ik añdherā sā ba-hañgām-e-sahar kaisā hai

kyuuñ har ik raah meñ vahshat sī barastī hai yahāñ

ek ik moḌ pe ye ḳhauf-o-ḳhatar kaisā hai

phir ye sochoñ meñ haiñ māyūsī kī lahreñ kaisī

phir ye har dil meñ udāsī kā guzar kaisā hai

us se ham chhāñv kī ummīd bhalā kyā rakkheñ

dhuup detā hai hamesha ye shajar kaisā hai

raushnī hai na havāoñ kā guzar hai is meñ

mere hisse meñ jo aayā hai ye ghar kaisā hai

ek muddat huī āñkhoñ se bahe the aañsū

dāman-e-shauq magar aaj bhī tar kaisā hai

umr bhar chal ke bhī paa.ī nahīñ manzil ham ne

kuchh samajh meñ nahīñ aatā ye safar kaisā hai

ham ne dekhe the ka.ī ḳhvāb suhāne lekin

tajraba ab huā ḳhvāboñ kā nagar kaisā hai

kaise ug aayā hai ābādī meñ vīrāna 'ḳhumār'

shahr ke biich ye sunsān khañDar kaisā hai

kuchh nahin hai to ye andesha ye Dar kaisa hai

ek andhera sa ba-hangam-e-sahar kaisa hai

kyun har ek rah mein wahshat si barasti hai yahan

ek ek moD pe ye KHauf-o-KHatar kaisa hai

phir ye sochon mein hain mayusi ki lahren kaisi

phir ye har dil mein udasi ka guzar kaisa hai

us se hum chhanw ki ummid bhala kya rakkhen

dhup deta hai hamesha ye shajar kaisa hai

raushni hai na hawaon ka guzar hai is mein

mere hisse mein jo aaya hai ye ghar kaisa hai

ek muddat hui aankhon se bahe the aansu

daman-e-shauq magar aaj bhi tar kaisa hai

umr bhar chal ke bhi pai nahin manzil hum ne

kuchh samajh mein nahin aata ye safar kaisa hai

hum ne dekhe the kai KHwab suhane lekin

tajraba ab hua KHwabon ka nagar kaisa hai

kaise ug aaya hai aabaadi mein virana 'KHumar'

shahr ke bich ye sunsan khanDar kaisa hai