kuchh nahin hone ke idrak se Darta kyun hai

kuchh nahīñ hone ke idrāk se Dartā kyuuñ hai

ḳhaak honā hai to phir ḳhaak se Dartā kyuuñ hai

jab kisī dast-e-zuleḳhā se ta.alluq hī nahīñ

apne dāman ke kisī chaak se Dartā kyuuñ hai

aise mausam meñ to har shāḳh pe phuul aate haiñ

āḳhir is mausam-e-namnāk se Dartā kyuuñ hai

kal sitāroñ ko bhī ḳhātir meñ nahīñ laatā thā

aaj sail-e-ḳhas-o-ḳhāshāk se Dartā kyuuñ hai

reshmī lafz-o-bayāñ se suḳhan-ārā.ī kar

apnī udhḌī huī poshāk se Dartā kyuuñ hai

vo ḳhud apne hī kisī jaal meñ phañs jā.egā

hausla rakh kisī chālāk se Dartā kyuuñ hai

ye to bas ik ravish-e-ḳhās pe kartī hai safar

aadmī gardish-e-aflāk se Dartā kyuuñ hai

kuchh nahin hone ke idrak se Darta kyun hai

KHak hona hai to phir KHak se Darta kyun hai

jab kisi dast-e-zuleKHa se talluq hi nahin

apne daman ke kisi chaak se Darta kyun hai

aise mausam mein to har shaKH pe phul aate hain

aaKHir is mausam-e-namnak se Darta kyun hai

kal sitaron ko bhi KHatir mein nahin lata tha

aaj sail-e-KHas-o-KHashak se Darta kyun hai

reshmi lafz-o-bayan se suKHan-arai kar

apni udhDi hui poshak se Darta kyun hai

wo KHud apne hi kisi jal mein phans jaega

hausla rakh kisi chaalak se Darta kyun hai

ye to bas ek rawish-e-KHas pe karti hai safar

aadmi gardish-e-aflak se Darta kyun hai