kuchh nahin tere siwa sochte hain

kuchh nahīñ tere sivā sochte haiñ

tujh ko hī bahr-e-ḳhudā sochte haiñ

dekh kar chāñd sitāroñ kī ravish

ham tire ghar kā patā sochte haiñ

chhoḌiye ishq kā farsūda ḳhayāl

ā.īye kuchh to nayā sochte haiñ

tere bin kaise guzartī ye hayāt

jaañ hī nikle jo zarā sochte haiñ

ham jo bo.eñge vahī kāTeñge

phir bhī auroñ kā burā sochte haiñ

TuuT kar phir nahīñ juḌtā hai dil

ye kahāñ ahl-e-jafā sochte haiñ

tum ki apnoñ se adāvat hai tumheñ

ham ki ġhairoñ kā bhalā sochte haiñ

kuchh nahin tere siwa sochte hain

tujh ko hi bahr-e-KHuda sochte hain

dekh kar chand sitaron ki rawish

hum tere ghar ka pata sochte hain

chhoDiye ishq ka farsuda KHayal

aaiye kuchh to naya sochte hain

tere bin kaise guzarti ye hayat

jaan hi nikle jo zara sochte hain

hum jo boenge wahi kaTenge

phir bhi auron ka bura sochte hain

TuT kar phir nahin juDta hai dil

ye kahan ahl-e-jafa sochte hain

tum ki apnon se adawat hai tumhein

hum ki ghairon ka bhala sochte hain