kuchh nai hum pe guzar jae to phir sher kahen

kuchh na.ī ham pe guzar jaa.e to phir sher kaheñ

bhūlī-bisrī koī yaad aa.e to phir sher kaheñ

zindagī ham ko lage phir se jo anjānī sī

aur gayā vaqt palaT aa.e to phir sher kaheñ

koī uḌtā huā āñchal koī bikhrī huī zulf

sher kahne ko jo uksā.e to phir sher kaheñ

fikr-e-fardā ġham-e-ayyām kā chhāyā hai ġhubār

zehn se dhuñd ye chhaT jaa.e to phir sher kaheñ

karb-e-ehsās kā iz.hār hai maqsūd-e-ġhazal

dard lafzoñ meñ simaT aa.e to phir sher kaheñ

kuchh nai hum pe guzar jae to phir sher kahen

bhuli-bisri koi yaad aae to phir sher kahen

zindagi hum ko lage phir se jo anjaani si

aur gaya waqt palaT aae to phir sher kahen

koi uDta hua aanchal koi bikhri hui zulf

sher kahne ko jo uksae to phir sher kahen

fikr-e-farda gham-e-ayyam ka chhaya hai ghubar

zehn se dhund ye chhaT jae to phir sher kahen

karb-e-ehsas ka izhaar hai maqsud-e-ghazal

dard lafzon mein simaT aae to phir sher kahen