kuchh roz chahaton ka ajab silsila raha

kuchh roz chāhatoñ kā ajab silsila rahā

vo dhaḌkanoñ meñ pyaar kī sūrat basā rahā

ik shaḳhs jis ko dil se bhulāyā thā baar baar

ye dil ki phir bhī us ko sadā sochtā rahā

jis ke junūñ meñ ham ne bitā dī tamām umr

ye kyā ki umr bhar hī vo ham se ḳhafā rahā

ye sach hai mujh se haath chhuḌā kar vo jā chukā

jaatā use maiñ duur talak dekhtā rahā

tum us kī be-ruḳhī pe pareshāñ ho kis liye

dil toḌnā to us kā sadā mashġhala rahā

chāhat meñ apnā zauq-e-safar bhī ajiib thā

us se hī shauq-e-husn-e-'masarrat' sajā rahā

kuchh roz chahaton ka ajab silsila raha

wo dhaDkanon mein pyar ki surat basa raha

ek shaKHs jis ko dil se bhulaya tha bar bar

ye dil ki phir bhi us ko sada sochta raha

jis ke junun mein hum ne bita di tamam umr

ye kya ki umr bhar hi wo hum se KHafa raha

ye sach hai mujh se hath chhuDa kar wo ja chuka

jata use main dur talak dekhta raha

tum us ki be-ruKHi pe pareshan ho kis liye

dil toDna to us ka sada mashghala raha

chahat mein apna zauq-e-safar bhi ajib tha

us se hi shauq-e-husn-e-'masarrat' saja raha