kuchh sae se har lahza kisi samt rawan hain

kuchh saa.e se har lahza kisī samt ravāñ haiñ

is shahr meñ varna na makīñ haiñ na makāñ haiñ

ham ḳhud se judā ho ke tujhe DhūñDne nikle

bikhre haiñ ab aise ki yahāñ haiñ na vahāñ haiñ

jaatī haiñ tire ghar ko sabhī shahr kī saḌkeñ

lagtā hai ki sab log tirī samt ravāñ haiñ

ai mauj-e-āvāra kabhī ham se bhī Takrā

ik umr se ham bhī sar-e-sāhil nigarāñ haiñ

to DhūñDh hameñ vaqt kī dīvār ke us paar

ham duur bahut duur kī manzil kā nishāñ haiñ

simTe the kabhī ham to samā.e sar-e-mizhgāñ

phaile haiñ ab aise ki karāñ-tā-ba-karāñ haiñ

ik din tire āñchal kī havā ban ke uḌe the

us din se zamāne kī nigāhoñ se nihāñ haiñ

toḌo na hamāre liye āvāz kā āhañg

ham log to ik Dūbte lamhe kī fuġhāñ haiñ

kuchh sae se har lahza kisi samt rawan hain

is shahr mein warna na makin hain na makan hain

hum KHud se juda ho ke tujhe DhunDne nikle

bikhre hain ab aise ki yahan hain na wahan hain

jati hain tere ghar ko sabhi shahr ki saDken

lagta hai ki sab log teri samt rawan hain

ai mauj-e-awara kabhi hum se bhi Takra

ek umr se hum bhi sar-e-sahil nigaran hain

to DhunDh hamein waqt ki diwar ke us par

hum dur bahut dur ki manzil ka nishan hain

simTe the kabhi hum to samae sar-e-mizhgan

phaile hain ab aise ki karan-ta-ba-karan hain

ek din tere aanchal ki hawa ban ke uDe the

us din se zamane ki nigahon se nihan hain

toDo na hamare liye aawaz ka aahang

hum log to ek Dubte lamhe ki fughan hain