kuchh safar ka ghubar jaisa tha

kuchh safar kā ġhubār jaisā thā

sāñsoñ par ik udhār jaisā thā

yak-ba-yak us kā aise chup honā

chīḳh thī yā pukār jaisā thā

jo kahā tum ne aur sunā maiñ ne

umr bhar ik ḳhumār jaisā thā

naam jo hoñT par nahīñ aayā

dhaḌkanoñ meñ shumār jaisā thā

naam terā likhā thā uñglī se

par shilā par ubhār jaisā thā

niim se chāñd chhan ke bikhrā thā

chāñdnī ko buḳhār jaisā thā

choT khā ke bhī gungunātā rahā

merā dil bhī sitār jaisā thā

terī chāhat kā jab bharam TuuTā

kuchh nashe ke utaar jaisā thā

yādoñ ke sab kagār Dhahte ga.e

vaqt bhī tez dhaar jaisā thā

dil pe ik bojh le ke jiitī rahī

jo gunāhoñ ke bhaar jaisā thā

kuchh safar ka ghubar jaisa tha

sanson par ek udhaar jaisa tha

yak-ba-yak us ka aise chup hona

chiKH thi ya pukar jaisa tha

jo kaha tum ne aur suna main ne

umr bhar ek KHumar jaisa tha

nam jo honT par nahin aaya

dhaDkanon mein shumar jaisa tha

nam tera likha tha ungli se

par shila par ubhaar jaisa tha

nim se chand chhan ke bikhra tha

chandni ko buKHar jaisa tha

choT kha ke bhi gungunata raha

mera dil bhi sitar jaisa tha

teri chahat ka jab bharam TuTa

kuchh nashe ke utar jaisa tha

yaadon ke sab kagar Dhahte gae

waqt bhi tez dhaar jaisa tha

dil pe ek bojh le ke jiti rahi

jo gunahon ke bhaar jaisa tha