kuchh samajh aata nahin yar karun ya na karun

kuchh samajh aatā nahīñ yaar karūñ yā na karūñ

un se maiñ 'ishq kā iz.hār karūñ yā na karūñ

terā dīdār huā dil meñ nahīñ kuchh hasrat

ab kisī aur kā dīdār karūñ yā na karūñ

vo taraf-dārī meñ aa.e to mujhe kyā ġham hai

ab kisī ko maiñ taraf-dār karūñ yā na karūñ

vo bhī iqrār kareñ yā na kareñ kyā hai ḳhabar

maiñ bhī uljhan meñ huuñ inkār karūñ yā na karūñ

'ishq ke phuul na.e taur khilā kar ab maiñ

dil kī vīrānī ko gulzār karūñ yā na karūñ

jo bhī karnā hai use shauq se kar hī guzro

sochnā sab hai ye be-kār karūñ yā na karūñ

tazkire 'ishq ke ahbāb se 'faisal' sun kar

maiñ shash-o-panj meñ huuñ pyaar karūñ yā na karūñ

kuchh samajh aata nahin yar karun ya na karun

un se main 'ishq ka izhaar karun ya na karun

tera didar hua dil mein nahin kuchh hasrat

ab kisi aur ka didar karun ya na karun

wo taraf-dari mein aae to mujhe kya gham hai

ab kisi ko main taraf-dar karun ya na karun

wo bhi iqrar karen ya na karen kya hai KHabar

main bhi uljhan mein hun inkar karun ya na karun

'ishq ke phul nae taur khila kar ab main

dil ki virani ko gulzar karun ya na karun

jo bhi karna hai use shauq se kar hi guzro

sochna sab hai ye be-kar karun ya na karun

tazkire 'ishq ke ahbab se 'faisal' sun kar

main shash-o-panj mein hun pyar karun ya na karun