کچھ سمجھ آیا تو سمجھا مجھے معلوم نہیں

کچھ سمجھ آیا تو سمجھا مجھے معلوم نہیں

مجھ کو معلوم ہے اب کیا مجھے معلوم نہیں

کس طرف جانا ہے بس اتنی خبر ہے مجھ کو

کس طرف جاتی ہے دنیا مجھے معلوم نہیں

میں تو بس پیاس بجھانے کے لیے آتا ہوں

کس طرف جاتا ہے دریا مجھے معلوم نہیں

دیکھ لیتا ہوں جہاں بھی وہ نظر آ جائے

یہ در و بام و دریچہ مجھے معلوم نہیں

اتنا معلوم ہے وہ مجھ کو بھلا لگتا ہے

اب پرایا ہے کہ اپنا مجھے معلوم نہیں

تم زمانے کا چلن پوچھ رہے ہو مجھ سے

اپنے بارے میں بھی اتنا مجھے معلوم نہیں

ہر کوئی اپنی سی تنہائی لیے پھرتا ہے

کون ہے کتنا اکیلا مجھے معلوم نہیں

اس گلی تک کوئی لے جائے تو کام ہو جائے

گھر تو معلوم ہے رستہ مجھے معلوم نہیں

آج زندہ ہوں یہی سوچ کے خوش رہتا ہوں

کیا ہوئی عمر گزشتہ مجھے معلوم نہیں