kuchh samajh aaya to samjha mujhe malum nahin

kuchh samajh aaya to samjhā mujhe ma.alūm nahīñ

mujh ko ma.alūm hai ab kyā mujhe ma.alūm nahīñ

kis taraf jaanā hai bas itnī ḳhabar hai mujh ko

kis taraf jaatī hai duniyā mujhe ma.alūm nahīñ

maiñ to bas pyaas bujhāne ke liye aatā huuñ

kis taraf jaatā hai dariyā mujhe ma.alūm nahīñ

dekh letā huuñ jahāñ bhī vo nazar aa jaa.e

ye dar-o-bām-o-darīcha mujhe ma.alūm nahīñ

itnā ma.alūm hai vo mujh ko bhalā lagtā hai

ab parāyā hai ki apnā mujhe ma.alūm nahīñ

tum zamāne kā chalan pūchh rahe ho mujh se

apne baare meñ bhī itnā mujhe ma.alūm nahīñ

har koī apnī sī tanhā.ī liye phirtā hai

kaun hai kitnā akelā mujhe ma.alūm nahīñ

us galī tak koī le jaa.e to kaam ho jaa.e

ghar to ma.alūm hai rasta mujhe ma.alūm nahīñ

aaj zinda huuñ yahī soch ke ḳhush rahtā huuñ

kyā huī umr-e-guzishta mujhe ma.alūm nahīñ

kuchh samajh aaya to samjha mujhe malum nahin

mujh ko malum hai ab kya mujhe malum nahin

kis taraf jaana hai bas itni KHabar hai mujh ko

kis taraf jati hai duniya mujhe malum nahin

main to bas pyas bujhane ke liye aata hun

kis taraf jata hai dariya mujhe malum nahin

dekh leta hun jahan bhi wo nazar aa jae

ye dar-o-baam-o-daricha mujhe malum nahin

itna malum hai wo mujh ko bhala lagta hai

ab paraya hai ki apna mujhe malum nahin

tum zamane ka chalan puchh rahe ho mujh se

apne bare mein bhi itna mujhe malum nahin

har koi apni si tanhai liye phirta hai

kaun hai kitna akela mujhe malum nahin

us gali tak koi le jae to kaam ho jae

ghar to malum hai rasta mujhe malum nahin

aaj zinda hun yahi soch ke KHush rahta hun

kya hui umr-e-guzishta mujhe malum nahin