kuchh sila hi na mila ishq mein jal jaane ka

kuchh sila hī na milā ishq meñ jal jaane kā

sham.a ne luuT liyā soz bhī parvāne kā

zabt-e-fariyād kī be-sūd tavaqqo dil se

zarf kyuuñ dekhiye TuuTe hue paimāne kā

merā miTnā nahīñ āsān mohabbat kī qasam

maut hai naam tire dil se utar jaane kā

hashr tak ro.egī duniyā-e-mohabbat mujh ko

silsila ḳhatm na hogā mire afsāne kā

maut kī niiñd se insāñ ko jagā detī hai

jis haqīqat meñ zarā rañg ho afsāne kā

is tarah mujh se muḳhātab hai zamāna jaise

hosh kī fikr bhī ik farz ho dīvāne kā

un ke andāz-e-sitam kā hai taqāzā 'bāsit'

ahd kar lījiye mar mar ke jiye jaane kā

kuchh sila hi na mila ishq mein jal jaane ka

shama ne luT liya soz bhi parwane ka

zabt-e-fariyaad ki be-sud tawaqqo dil se

zarf kyun dekhiye TuTe hue paimane ka

mera miTna nahin aasan mohabbat ki qasam

maut hai nam tere dil se utar jaane ka

hashr tak roegi duniya-e-mohabbat mujh ko

silsila KHatm na hoga mere afsane ka

maut ki nind se insan ko jaga deti hai

jis haqiqat mein zara rang ho afsane ka

is tarah mujh se muKHatab hai zamana jaise

hosh ki fikr bhi ek farz ho diwane ka

un ke andaz-e-sitam ka hai taqaza 'basit'

ahd kar lijiye mar mar ke jiye jaane ka