kuchh soch ke parwana mahfil mein jala hoga

kuchh soch ke parvāna mahfil meñ jalā hogā

shāyad isī marne meñ jiine kā mazā hogā

har sa.ī-e-sitam par aañsū nikal aa.e haiñ

anjām-e-tarab-koshī kyā jāniye kyā hogā

gumrāh-e-mohabbat huuñ pūchho na mirī manzil

har naqsh-e-qadam merā manzil kā patā hogā

kyā terā mudāvā ho dard-e-shab-e-tanhā.ī

chup rahiye to barbādī kahiye to gilā hogā

katrā ke to jaate ho dīvāne ke raste se

dīvāna lipaT jaa.e qadmoñ se to kyā hogā

maiḳhāne se masjid tak milte haiñ nuqūsh-e-pā

yā shaiḳh ga.e hoñge yā rind gayā hogā

farzānoñ kā kyā kahnā har baat pe laḌte haiñ

dīvāne se dīvāna shāyad hī laḌā hogā

rindoñ ko 'hafīz' itnā samjhā de koī jā kar

aapas meñ laḌoge tum vaa.iz kā bhalā hogā

kuchh soch ke parwana mahfil mein jala hoga

shayad isi marne mein jine ka maza hoga

har sai-e-sitam par aansu nikal aae hain

anjam-e-tarab-koshi kya jaaniye kya hoga

gumrah-e-mohabbat hun puchho na meri manzil

har naqsh-e-qadam mera manzil ka pata hoga

kya tera mudawa ho dard-e-shab-e-tanhai

chup rahiye to barbaadi kahiye to gila hoga

katra ke to jate ho diwane ke raste se

diwana lipaT jae qadmon se to kya hoga

maiKHane se masjid tak milte hain nuqush-e-pa

ya shaiKH gae honge ya rind gaya hoga

farzanon ka kya kahna har baat pe laDte hain

diwane se diwana shayad hi laDa hoga

rindon ko 'hafiz' itna samjha de koi ja kar

aapas mein laDoge tum waiz ka bhala hoga