kuchh tere naz-o-sitam aur uThana chahe

kuchh tire nāz-o-sitam aur uThānā chāhe

dil mirā aql se phir aañkh churānā chāhe

apne hālāt koī mujh ko sunānā chāhe

aur vo ik baat jo mujh se hī chhupānā chāhe

merī ḳhvāhish ki terī yaad se ġhāfil na rahūñ

fikr-e-duniyā terī yādoñ ko miTānā chāhe

zehn duniyā kī haqīqat ko samajhne pe musir

dil ki bas ḳhvāboñ kī bastī meñ Thikānā chāhe

maiñ akelā to nahīñ us kī adā kā mahsūr

kuchh sabab hai ke use saarā zamāna chāhe

jis ko duniyā se hai āshufta-mizājī kā gila

vo bhī is ālam-e-fānī se na jaanā chāhe

ham ne ḳhāliq kī razā par kahāñ tolī har baat

bas vahī karte haiñ jo nafs karānā chāhe

kaun pahchāne hai 'shārib' tujhe is vaadī meñ

bin ta.āruf to koī yaañ se na jaanā chāhe

kuchh tere naz-o-sitam aur uThana chahe

dil mera aql se phir aankh churana chahe

apne haalat koi mujh ko sunana chahe

aur wo ek baat jo mujh se hi chhupana chahe

meri KHwahish ki teri yaad se ghafil na rahun

fikr-e-duniya teri yaadon ko miTana chahe

zehn duniya ki haqiqat ko samajhne pe musir

dil ki bas KHwabon ki basti mein Thikana chahe

main akela to nahin us ki ada ka mahsur

kuchh sabab hai ke use sara zamana chahe

jis ko duniya se hai aashufta-mizaji ka gila

wo bhi is aalam-e-fani se na jaana chahe

hum ne KHaliq ki raza par kahan toli har baat

bas wahi karte hain jo nafs karana chahe

kaun pahchane hai 'shaarib' tujhe is wadi mein

bin taaruf to koi yan se na jaana chahe