kuchh to bolo miyan hua kya hai

kuchh to bolo miyāñ huā kyā hai

is qadar ḳhāmushī vaj.h kyā hai

phir rahe ho galī galī dar dar

yuuñ bhaTakne se fā.eda kyā hai

maiñ jo kahtā huuñ tum suno to sahī

bahs-o-takrār meñ rakhā kyā hai

aaj Duube to phir na ubhreñge

mauj-e-hastī kā aasrā kyā hai

qatra-e-be-karāñ hai garche sanam

phir sanam-gar batā ḳhudā kyā hai

dil hamāre kabhī mile hī nahīñ

ham mileñ bhī to fā.eda kyā hai

rafta rafta badal gayā 'abrār'

tum bhī badlo miyāñ burā kyā hai

kuchh to bolo miyan hua kya hai

is qadar KHamushi wajh kya hai

phir rahe ho gali gali dar dar

yun bhaTakne se faeda kya hai

main jo kahta hun tum suno to sahi

bahs-o-takrar mein rakha kya hai

aaj Dube to phir na ubhrenge

mauj-e-hasti ka aasra kya hai

qatra-e-be-karan hai garche sanam

phir sanam-gar bata KHuda kya hai

dil hamare kabhi mile hi nahin

hum milen bhi to faeda kya hai

rafta rafta badal gaya 'abrar'

tum bhi badlo miyan bura kya hai