kuchh to duniya se kama le jaiye

kuchh to duniyā se kamā le jā.iye

ham faqīroñ kī du'ā le jā.iye

ho sake to us kī chaukhaT ke liye

sajda-e-dil-āshnā le jā.iye

ye bhī kyā kam hai ki us ke shahr meñ

sirf zaḳhmoñ kī ridā le jā.iye

ab charāġhoñ se dhuāñ uThne lagā

ab charāġhoñ ko uThā le jā.iye

sirf ummīd-e-vafā par 'umr bhar

āstīñ meñ saañp paale jā.iye

taaki maiñ ḳhud se bhī poshīda rahūñ

parda ā.īne pe Daale jā.iye

is se zālim ke baḌheñge hausle

yuuñ na zaḳhmoñ ko chhupā le jā.iye

aur to kuchh bhī nahīñ dil ke sivā

jo bhī hai achchhā burā le jā.iye

kuchh to duniya se kama le jaiye

hum faqiron ki du'a le jaiye

ho sake to us ki chaukhaT ke liye

sajda-e-dil-ashna le jaiye

ye bhi kya kam hai ki us ke shahr mein

sirf zaKHmon ki rida le jaiye

ab charaghon se dhuan uThne laga

ab charaghon ko uTha le jaiye

sirf ummid-e-wafa par 'umr bhar

aastin mein sanp pale jaiye

taki main KHud se bhi poshida rahun

parda aaine pe Dale jaiye

is se zalim ke baDhenge hausle

yun na zaKHmon ko chhupa le jaiye

aur to kuchh bhi nahin dil ke siwa

jo bhi hai achchha bura le jaiye