kuchh to hasil ho gaya irfan-e-mai-KHana mujhe

kuchh to hāsil ho gayā irfān-e-mai-ḳhāna mujhe

aaj paimāne ko maiñ taktā huuñ paimāna mujhe

daar par naġhmoñ kā chhā jaanā koī āsāñ nahīñ

saaz kyā kam thā jo baḳhshā soz-e-parvāna mujhe

joḌ Daale kitne sāġhar kitne miinā kitne dil

ik zarā jo mil ga.ī thī ḳhāk-e-mai-ḳhāna mujhe

zindagī apnī haqīqat hī haqīqat thī magar

aaj duniyā ne banā Daalā hai afsāna mujhe

rishta-e-derīna-e-vahshat na TuuTā aaj tak

yaad vīrāne ko maiñ kartā huuñ vīrāna mujhe

sub.h-e-ka.aba shām-e-but-ḳhāna kī hai mujh ko talāsh

DhūñDhtī hai sub.h-e-ka.aba shām-e-but-ḳhāna mujhe

kuchh to hasil ho gaya irfan-e-mai-KHana mujhe

aaj paimane ko main takta hun paimana mujhe

dar par naghmon ka chha jaana koi aasan nahin

saz kya kam tha jo baKHsha soz-e-parwana mujhe

joD Dale kitne saghar kitne mina kitne dil

ek zara jo mil gai thi KHak-e-mai-KHana mujhe

zindagi apni haqiqat hi haqiqat thi magar

aaj duniya ne bana Dala hai afsana mujhe

rishta-e-derina-e-wahshat na TuTa aaj tak

yaad virane ko main karta hun virana mujhe

subh-e-kaba sham-e-but-KHana ki hai mujh ko talash

DhunDhti hai subh-e-kaba sham-e-but-KHana mujhe