kuchh to hamare darmiyan hai dil-lagi abhi

kuchh to hamāre darmiyāñ hai dil-lagī abhī

terī nigāh-e-nāz meñ hai tishnagī abhī

ḳhāmoshiyāñ ajiib haiñ is sard shahr kī

barfīlī is havā meñ hai dīvāngī abhī

sauġhāt mil rahī hai tirī yaad kī mujhe

is hijr ne sikhā.ī bahut shā.irī abhī

vo biit hī ga.ī jo amāvas kī raat thī

phailī hai mere chāroñ taraf chāñdnī abhī

jaane vo kaun log the jo kar ga.e vafā

tum se to ho sakī na zarā dilbarī abhī

ab bhī 'hinā' sahegā na-jāne vo kitne ġham

qismat meñ us kī hai likhī ye be-gharī abhī

kuchh to hamare darmiyan hai dil-lagi abhi

teri nigah-e-naz mein hai tishnagi abhi

KHamoshiyan ajib hain is sard shahr ki

barfili is hawa mein hai diwangi abhi

saughat mil rahi hai teri yaad ki mujhe

is hijr ne sikhai bahut shairi abhi

wo bit hi gai jo amawas ki raat thi

phaili hai mere chaaron taraf chandni abhi

jaane wo kaun log the jo kar gae wafa

tum se to ho saki na zara dilbari abhi

ab bhi 'hina' sahega na-jaane wo kitne gham

qismat mein us ki hai likhi ye be-ghari abhi