kuchh to jawab abru-e-KHamdar le chalo

kuchh to javāb abrū-e-ḳhamdār le chalo

zahrāb meñ bujhī huī talvār le chalo

parkho mujhe banā ke ḳharīdār le chalo

yūsuf bikeñ agar sar-e-bāzār le chalo

is anjuman meñ dostoñ sanjīdgī hai kam

tum apne saath talḳhī-e-afkār le chalo

phir tez ho ga.ī ġham-e-ḳhud-āgahī kī aañch

phir mujh ko sū-e-ḳhāna-e-ḳhammār le chalo

be-sāḳhta kahīñ na ugal duuñ maiñ rāz-e-dil

muñh-phaT huuñ tum mujhe bhī sar-e-dār le chalo

phir māñgtī hai dil kī taḌap sajda-reziyāñ

phir mujh ko nazd-e-sang-e-dar-e-yār le chalo

bahr-e-sukūn-e-qalb 'jamālī' ko dosto

jis jā haiñ jam' sāqī-o-mai-ḳhvār le chalo

kuchh to jawab abru-e-KHamdar le chalo

zahrab mein bujhi hui talwar le chalo

parkho mujhe bana ke KHaridar le chalo

yusuf biken agar sar-e-bazar le chalo

is anjuman mein doston sanjidgi hai kam

tum apne sath talKHi-e-afkar le chalo

phir tez ho gai gham-e-KHud-agahi ki aanch

phir mujh ko su-e-KHana-e-KHammar le chalo

be-saKHta kahin na ugal dun main raaz-e-dil

munh-phaT hun tum mujhe bhi sar-e-dar le chalo

phir mangti hai dil ki taDap sajda-reziyan

phir mujh ko nazd-e-sang-e-dar-e-yar le chalo

bahr-e-sukun-e-qalb 'jamali' ko dosto

jis ja hain jam' saqi-o-mai-KHwar le chalo