kuchh to mushkil mein kaam aate hain

kuchh to mushkil meñ kaam aate haiñ

kuchh faqat mushkileñ baḌhāte haiñ

apne ehsān jo jatāte haiñ

apnā hī martaba ghaTāte haiñ

sabr se intizār karnā siikh

achchhe din aate aate aate haiñ

fāsloñ se gurez kyā karnā

fāsle qurbateñ baḌhāte haiñ

kuchh to bār-e-nazar bhī hote haiñ

saare manzar kahāñ lubhāte haiñ

vo jo rahte haiñ be-havās aksar

hādsoñ ko vahī bulāte haiñ

koī ustād kyā sikhā.egā

jo sabaq sānehe sikhāte haiñ

jab vo milne se kuchh gurez kare

vāhime dil meñ kasmasāte haiñ

saarī yādeñ to ḳhush-gavār nahiñ

talḳh lamhe bhī yaad aate haiñ

dil meñ hotā hai vajd kā 'ālam

taan vo dil se jab lagāte haiñ

yaad ik hiir kī satātī hai

bāñsurī jab kabhī bajāte haiñ

naġhme gaate the jo masarrat ke

aaj kal marsiye sunāte haiñ

baat kī baat hī ise kahiye

qahqahe dard-o-ġham miTāte haiñ

kam hī ab rah ga.e haiñ jo 'rāshid'

dard kī mahfileñ sajāte haiñ

kuchh to mushkil mein kaam aate hain

kuchh faqat mushkilen baDhate hain

apne ehsan jo jatate hain

apna hi martaba ghaTate hain

sabr se intizar karna sikh

achchhe din aate aate aate hain

faslon se gurez kya karna

fasle qurbaten baDhate hain

kuchh to bar-e-nazar bhi hote hain

sare manzar kahan lubhate hain

wo jo rahte hain be-hawas aksar

hadson ko wahi bulate hain

koi ustad kya sikhaega

jo sabaq sanehe sikhate hain

jab wo milne se kuchh gurez kare

wahime dil mein kasmasate hain

sari yaaden to KHush-gawar nahin

talKH lamhe bhi yaad aate hain

dil mein hota hai wajd ka 'alam

tan wo dil se jab lagate hain

yaad ek hir ki satati hai

bansuri jab kabhi bajate hain

naghme gate the jo masarrat ke

aaj kal marsiye sunate hain

baat ki baat hi ise kahiye

qahqahe dard-o-gham miTate hain

kam hi ab rah gae hain jo 'rashid'

dard ki mahfilen sajate hain