کچھ تو نقصان ہمیں اپنی شرافت میں ہوا

کچھ تو نقصان ہمیں اپنی شرافت میں ہوا

اور باقی جو بچا تھا سو محبت میں ہوا

مسئلہ جتنا بھی سنگین رہا ہو لیکن

فیصلہ جو بھی ہوا ہم سے وہ عجلت میں ہوا

شاخ سے ٹوٹا تو پامال کیا لوگوں نے

برگ کا حشر عجب عالم ہجرت میں ہوا

مجھ کو ارباب زمانہ سے کوئی لاگ نہ تھی

میں تو مردود جہاں بس تری شفقت میں ہوا

خاکساری پہ بہت ناز اسے تھا لیکن

اس کا ثانی بھی مگر کون رعونت میں ہوا

سرخ روئی ترے دربار میں کس نے پائی

طاق ویسے تو بہت میں بھی لیاقت میں ہوا