kuchh to nuqsan hamein apni sharafat mein hua

kuchh to nuqsān hameñ apnī sharāfat meñ huā

aur baaqī jo bachā thā so mohabbat meñ huā

mas.ala jitnā bhī sangīn rahā ho lekin

faisla jo bhī huā ham se vo ujlat meñ huā

shāḳh se TuuTā to pāmāl kiyā logoñ ne

barg kā hashr ajab ālam-e-hijrat meñ huā

mujh ko arbāb-e-zamāna se koī laag na thī

maiñ to mardūd-e-jahāñ bas tirī shafqat meñ huā

ḳhāksārī pe bahut naaz use thā lekin

us kā saanī bhī magar kaun ra.ūnat meñ huā

surḳh-rūī tire darbār meñ kis ne paa.ī

taaq vaise to bahut maiñ bhī liyāqat meñ huā

kuchh to nuqsan hamein apni sharafat mein hua

aur baqi jo bacha tha so mohabbat mein hua

masala jitna bhi sangin raha ho lekin

faisla jo bhi hua hum se wo ujlat mein hua

shaKH se TuTa to pamal kiya logon ne

barg ka hashr ajab aalam-e-hijrat mein hua

mujh ko arbab-e-zamana se koi lag na thi

main to mardud-e-jahan bas teri shafqat mein hua

KHaksari pe bahut naz use tha lekin

us ka sani bhi magar kaun raunat mein hua

surKH-rui tere darbar mein kis ne pai

taq waise to bahut main bhi liyaqat mein hua