kuchh usne socha to tha magar kaam kar diya tha

kuchh us ne sochā to thā magar kaam kar diyā thā

jo mere ḳhvāboñ ko itne rañgoñ se bhar diyā thā

ġhubār meñ bhiig sī ga.ī thī fazā kisī ne

rukī huī raat ko vo rañg-e-sahar diyā thā

isī ke andar thī saarī pechīdgī ki us ne

kahāñ khaḌā thā maiñ aur ishāra kidhar diyā thā

chalo is asnā meñ merī āñkheñ to khul ga.ī haiñ

kabhī jo us ne mujhe fareb-e-nazar diyā thā

kisī bhī din baiTh kar ye duniyā hisāb kar le

ki mujh se kitnā liyā hai aur kas qadar diyā thā

maiñ kar sakūñ sab ke sāmne apnī aib-jūī

ye dene vaale ne ḳhaas mujh ko hunar diyā thā

isī meñ thā Dūbnā ubharnā mirā muqaddar

lahū ke andar mujhe ik aisā bhañvar diyā thā

jo dhuup kī aag us ne barsā.ī thī zamīñ par

to chhāñv meñ baiThne kī ḳhātir shajar diyā thā

ye us kī marzī ki le liyā hai usī ne vāpas

'zafar' mirī shā.erī ko jis ne asar diyā thā

kuchh us ne socha to tha magar kaam kar diya tha

jo mere KHwabon ko itne rangon se bhar diya tha

ghubar mein bhig si gai thi faza kisi ne

ruki hui raat ko wo rang-e-sahar diya tha

isi ke andar thi sari pechidgi ki us ne

kahan khaDa tha main aur ishaara kidhar diya tha

chalo is asna mein meri aankhen to khul gai hain

kabhi jo us ne mujhe fareb-e-nazar diya tha

kisi bhi din baiTh kar ye duniya hisab kar le

ki mujh se kitna liya hai aur kas qadar diya tha

main kar sakun sab ke samne apni aib-jui

ye dene wale ne KHas mujh ko hunar diya tha

isi mein tha Dubna ubharna mera muqaddar

lahu ke andar mujhe ek aisa bhanwar diya tha

jo dhup ki aag us ne barsai thi zamin par

to chhanw mein baiThne ki KHatir shajar diya tha

ye us ki marzi ki le liya hai usi ne wapas

'zafar' meri shaeri ko jis ne asar diya tha