kuchh uzr pas-e-wada-KHilafi nahin rakhte

kuchh 'uzr pas-e-va.ada-ḳhilāfī nahīñ rakhte

ho kaise masīhā dam-e-shāfī nahīñ rakhte

aise to na the zaḳhm ki jo bhar hī na paate

ahbāb magar zarf-e-talāfī nahīñ rakhte

is chain se jiine meñ koī bhed nahīñ hai

bas ye ki tamannā.eñ izāfī nahīñ rakhte

is daur meñ insāf panap hī nahīñ saktā

iḳhlās-e-qalam jis meñ sahāfī nahīñ rakhte

haiñ aur bhī duniyā meñ suḳhanvar bahut achchhe

ham jaisā magar zauq-e-qavāfī nahīñ rakhte

ye mo'jiza mohtāj hai pindār-e-vafā kā

sab teshe dam-e-koh-shigāfī nahīñ rakhte

har baat meñ kam-māya nazar aate haiñ 'anjum'

rāhat to kujā dard bhī kaafī nahīñ rakhte

kuchh 'uzr pas-e-wada-KHilafi nahin rakhte

ho kaise masiha dam-e-shafi nahin rakhte

aise to na the zaKHm ki jo bhar hi na pate

ahbab magar zarf-e-talafi nahin rakhte

is chain se jine mein koi bhed nahin hai

bas ye ki tamannaen izafi nahin rakhte

is daur mein insaf panap hi nahin sakta

iKHlas-e-qalam jis mein sahafi nahin rakhte

hain aur bhi duniya mein suKHanwar bahut achchhe

hum jaisa magar zauq-e-qawafi nahin rakhte

ye mo'jiza mohtaj hai pindar-e-wafa ka

sab teshe dam-e-koh-shigafi nahin rakhte

har baat mein kam-maya nazar aate hain 'anjum'

rahat to kuja dard bhi kafi nahin rakhte