کچھ وجودی کچھ شہودی فلسفہ سنسار کا

کچھ وجودی کچھ شہودی فلسفہ سنسار کا

کس قدر دلچسپ ہے شہکار اس فنکار کا

یہ زمیں پھولوں کی ہے رنگوں کی ہے خوشبو کی ہے

اس محبت کی زمیں پر کام کیا تلوار کا

خوں دواتوں میں قلم میں دھار پہلے سی کہاں

چاپلوسی سے بھرا ہے ہر ورق اخبار کا

اب لباسوں کی نمائش ہو رہی ہے ہر طرف

آدمی کی ذات میں فقدان ہے کردار کا

اپنی بربادی کا ذمہ دار آخر کون ہے

ہم ہی خود ہیں یا کہ اس میں ہاتھ ہے سرکار کا

ہم لگائیں کس پہ تہمت اور کسے الزام دیں

جبکہ ہے کردار ہی مشکوک پہرے دار کا