kuchh zaban nahin khulti kaifiyat wo tari hai

kuchh zabāñ nahīñ khultī kaifiyat vo taarī hai

ḳhāmushī ke lahje meñ bāt-chīt jaarī hai

tum ko kyā ḳhabar kyā hai 'ālam-e-shab-e-furqat

jaañ ko vahshateñ lāhaq dil ko be-qarārī hai

bad-havās āñkhoñ se rāste ko taktā huuñ

kuchh samajh nahīñ aatā kis kī intizārī hai

ghūmtī hai āñkhoñ meñ ek sāñvlī sūrat

dil pe yaad kā ġhalba lab pe āh-o-zārī hai

log merī ġhazloñ meñ tum ko DhūñD lete haiñ

she’r-o-shā’erī kab hai dāstāñ tumhārī hai

jo the dil kī dil-jūī duur ho chale 'kāzim'

ab to mashġhala apnā sirf dil-figārī hai

kuchh zaban nahin khulti kaifiyat wo tari hai

KHamushi ke lahje mein baat-chit jari hai

tum ko kya KHabar kya hai 'alam-e-shab-e-furqat

jaan ko wahshaten lahaq dil ko be-qarari hai

bad-hawas aankhon se raste ko takta hun

kuchh samajh nahin aata kis ki intizari hai

ghumti hai aankhon mein ek sanwli surat

dil pe yaad ka ghalba lab pe aah-o-zari hai

log meri ghazlon mein tum ko DhunD lete hain

she’r-o-sha’eri kab hai dastan tumhaari hai

jo the dil ki dil-jui dur ho chale 'kazim'

ab to mashghala apna sirf dil-figari hai