kufr ko iman bana de zindagi ai zindagi

kufr ko īmāñ banā de zindagī ai zindagī

farq-e-īn-o-āñ miTā de zindagī ai zindagī

mujh ko ik-tarfa sazā de zindagī ai zindagī

dard-e-dil ko dil banā de zindagī ai zindagī

aah ko naġhma banā de zindagī ai zindagī

merī lai meñ lai milā de zindagī ai zindagī

jab ḳhilāf-e-maslahat hai izn-e-‘arz-e-mudda.ā

ḳhud-kalāmī hī sikhā de zindagī ai zindagī

vo ajal jo fitratan hai dushman-e-husn-e-‘amal

us ko qadmoñ par jhukā de zindagī ai zindagī

jurm-e-nā-karda-gunāhī bhī hai jurm-e-nā-sazā

haañ mujhe is kī sazā de zindagī ai zindagī

mauj-e-sail-e-ġham ne jo chhīnā hai tujh se vo sukūñ

nāḳhudā de yā ḳhudā de zindagī ai zindagī

inqilāb-e-vaqt kī tū ham-qadam ho jā.egī

ye tire kāfir irāde zindagī ai zindagī

dil kī dhaḌkan baḌh rahī hai barq-raftārī ke saath

tū jo chāhe vo du'ā de zindagī ai zindagī

'umr-bhar kī sogvārī kī talāfī chāhiye

muskurā de muskurā de zindagī ai zindagī

har qadam par har nafas par terā dam bhartā huuñ maiñ

dād-e-andāz-e-vafā de zindagī ai zindagī

mere dil kī har taḌap hai be-qarārī kī dalīl

mauj sāhil-āshnā de zindagī ai zindagī

aaj tak tū ne dikhā.e haiñ jo ḳhvāb-e-nau-ba-nau

un ko ā.īna banā de zindagī ai zindagī

maiñ ne dil se shah ko nazr-e-dushman-e-jāñ kar diyā

ab sazā de yā jazā de zindagī ai zindagī

yā to ab āsān kar dushvārī-e-sa'ī-e-'urūj'

yā ise patthar banā de zindagī ai zindagī

kufr ko iman bana de zindagi ai zindagi

farq-e-in-o-an miTa de zindagi ai zindagi

mujh ko ik-tarfa saza de zindagi ai zindagi

dard-e-dil ko dil bana de zindagi ai zindagi

aah ko naghma bana de zindagi ai zindagi

meri lai mein lai mila de zindagi ai zindagi

jab KHilaf-e-maslahat hai izn-e-‘arz-e-muddaa

KHud-kalami hi sikha de zindagi ai zindagi

wo ajal jo fitratan hai dushman-e-husn-e-‘amal

us ko qadmon par jhuka de zindagi ai zindagi

jurm-e-na-karda-gunahi bhi hai jurm-e-na-saza

han mujhe is ki saza de zindagi ai zindagi

mauj-e-sail-e-gham ne jo chhina hai tujh se wo sukun

naKHuda de ya KHuda de zindagi ai zindagi

inqilab-e-waqt ki tu ham-qadam ho jaegi

ye tere kafir irade zindagi ai zindagi

dil ki dhaDkan baDh rahi hai barq-raftari ke sath

tu jo chahe wo du'a de zindagi ai zindagi

'umr-bhar ki sogwari ki talafi chahiye

muskura de muskura de zindagi ai zindagi

har qadam par har nafas par tera dam bharta hun main

dad-e-andaz-e-wafa de zindagi ai zindagi

mere dil ki har taDap hai be-qarari ki dalil

mauj sahil-ashna de zindagi ai zindagi

aaj tak tu ne dikhae hain jo KHwab-e-nau-ba-nau

un ko aaina bana de zindagi ai zindagi

main ne dil se shah ko nazr-e-dushman-e-jaan kar diya

ab saza de ya jaza de zindagi ai zindagi

ya to ab aasan kar dushwari-e-sa'i-e-'uruj'

ya ise patthar bana de zindagi ai zindagi