kun ki manzil par ruka hai qafila taqdir ka

kun kī manzil par rukā hai qāfila taqdīr kā

bas ki hai nāqid musavvir apnī hī tasvīr kā

mil na pā.egī rihā.ī vaqt ke zindān se

sūrat-e-shām-o-sahar hai silsila zanjīr kā

zindagī apnī basar hotī hamesha ḳhvāb meñ

ḳhvāb meñ khultā nahīñ uqda agar ta.abīr kā

vāris-e-kaun-o-makāñ haiñ kahkashāñ-dar-kahkashāñ

kyoñ na ho vābasta ham se silsila tasḳhīr kā

zehn se jis dam hue the muttasil lauh-o-qalam

ho gayā thā hal vahīñ par mas.ala tadbīr kā

ḳhāma-e-dil se raqam karte rahe ahd-e-vafā

hai koī zāmin hamārī hurmat-e-tahrīr kā

zindagī meñ ham bhī rakhte sar sināñ kī nok par

jaan lete gar ishāra kātib-e-taqdīr kā

jumbish-e-abrū se us ko kar diyā zinda 'shakīl'

kāġhzī thā naqsh jo ab tak tirī tasvīr kā

kun ki manzil par ruka hai qafila taqdir ka

bas ki hai naqid musawwir apni hi taswir ka

mil na paegi rihai waqt ke zindan se

surat-e-sham-o-sahar hai silsila zanjir ka

zindagi apni basar hoti hamesha KHwab mein

KHwab mein khulta nahin uqda agar tabir ka

waris-e-kaun-o-makan hain kahkashan-dar-kahkashan

kyon na ho wabasta hum se silsila tasKHir ka

zehn se jis dam hue the muttasil lauh-o-qalam

ho gaya tha hal wahin par masala tadbir ka

KHama-e-dil se raqam karte rahe ahd-e-wafa

hai koi zamin hamari hurmat-e-tahrir ka

zindagi mein hum bhi rakhte sar sinan ki nok par

jaan lete gar ishaara katib-e-taqdir ka

jumbish-e-abru se us ko kar diya zinda 'shakil'

kaghzi tha naqsh jo ab tak teri taswir ka