kunj-e-tanhai mein rakkha hua rah jata hai

kunj-e-tanhā.ī meñ rakkhā huā rah jaatā hai

dil ki siine meñ uchhaltā huā rah jaatā hai

jumbish-e-chashm se duniyā hī badal jaatī hai

aur mirī aañkh meñ sochā huā rah jaatā hai

ab to aisā hai ki āñkhoñ ko agar khol bhī luuñ

dil kisī ḳhvāb meñ lipTā huā rah jaatā hai

likh to lete haiñ tirā naam ba-sad shauq magar

kyā kabhī ret pe likkhā huā rah jaatā hai

kuchh chalā jaatā hai dariyāoñ ke hamrāh ye dil

kuchh rag-e-jāñ meñ hī bahtā huā rah jaatā hai

us kī yādoñ ko dil-o-jān se ruḳhsat karnā

kaam aisā hai ki hotā huā rah jaatā hai

maiñ to lauT aatā huuñ har shaam ko ghar meñ lekin

dil kisī raah pe chaltā huā rah jaatā hai

kunj-e-tanhai mein rakkha hua rah jata hai

dil ki sine mein uchhalta hua rah jata hai

jumbish-e-chashm se duniya hi badal jati hai

aur meri aankh mein socha hua rah jata hai

ab to aisa hai ki aankhon ko agar khol bhi lun

dil kisi KHwab mein lipTa hua rah jata hai

likh to lete hain tera nam ba-sad shauq magar

kya kabhi ret pe likkha hua rah jata hai

kuchh chala jata hai dariyaon ke hamrah ye dil

kuchh rag-e-jaan mein hi bahta hua rah jata hai

us ki yaadon ko dil-o-jaan se ruKHsat karna

kaam aisa hai ki hota hua rah jata hai

main to lauT aata hun har sham ko ghar mein lekin

dil kisi rah pe chalta hua rah jata hai