kurra-e-arz ko tarik bana dena tha

kurra-e-arz ko tārīk banā denā thā

hijr kī shab meñ sitāroñ ko bujhā denā thā

kitnī dahshat hai mire shahr meñ sannāTe kī

naḳhl-e-āvāz yahāñ bhī to lagā denā thā

tū ki maujūd agar misl-e-havā sehn meñ thā

shajar-e-jāmid-o-sākit ko hilā denā thā

pur-sukūñ kab se mire dil kā hai sahrā-e-sukūt

aa ke is meñ bhī kabhī hashr uThā denā thā

husn ke manzar-e-saffāk nazar aate saaf

parda-e-ḳhvāb ko āñkhoñ se haTā denā thā

rañg kuchh sub.h-e-qayāmat kā alag hī hotā

chehra-e-mehr se bhī rañg uḌā denā thā

kurra-e-arz ko tarik bana dena tha

hijr ki shab mein sitaron ko bujha dena tha

kitni dahshat hai mere shahr mein sannaTe ki

naKHl-e-awaz yahan bhi to laga dena tha

tu ki maujud agar misl-e-hawa sehn mein tha

shajar-e-jamid-o-sakit ko hila dena tha

pur-sukun kab se mere dil ka hai sahra-e-sukut

aa ke is mein bhi kabhi hashr uTha dena tha

husn ke manzar-e-saffak nazar aate saf

parda-e-KHwab ko aankhon se haTa dena tha

rang kuchh subh-e-qayamat ka alag hi hota

chehra-e-mehr se bhi rang uDa dena tha