کشتگان گردش ایام ہونا تھا ہوئے

کشتگان گردش ایام ہونا تھا ہوئے

گم تھے ہم خوابوں میں جو انجام ہونا تھا ہوئے

ہر فساد نو پہ اک قانون نو بنتا گیا

پھر بھی صبح و شام قتل عام ہونا تھا ہوئے

اپنی لاش اپنے ہی کاندھوں پر لیے ہم عمر بھر

ہم سفر حالات کے ہر گام ہونا تھا ہوئے

ظلمتوں نے رات کی مانگے لہو کے پھر چراغ

پھر اجالوں کو ہمارے نام ہونا تھا ہوئے

تھا بپا ہر شہر میں ہنگامۂ زاغ و زغن

اور ہم شاہین زیر دام ہونا تھا ہوئے

اس ستم ایجاد کی ہر طرز نو پر جان دی

پھر بھی زیر خنجر دشنام ہونا تھا ہوئے

آبرو ہم نے بڑھائی شمع کی شہرت بھی دی

ہم سے پروانے مگر گمنام ہونا تھا ہوئے

اب تو مائل ہے نمائش پر مزاج حسن بھی

اہل دل کو عشق میں ناکام ہونا تھا ہوئے

ایک میٹھا زہر جیسے پیار تھا اس کا کلیمؔ

جاں بہ لب جام لب گلفام ہونا تھا ہوئے