کشتگان عشق کو فرقت میں کب آتی ہے نیند

کشتگان عشق کو فرقت میں کب آتی ہے نیند

ان کے آہ و گریاں سے دراصل گھبراتی ہے نیند

اس لیے میں نیند کو ہر دم ہی رکھتا ہوں عزیز

خواب میں بچھڑے ہوؤں کو کھینچ کر لاتی ہے نیند

جب تصور میں کبھی بھولے سے آ جاتے ہیں وہ

کچھ سکوں ملتا ہے مجھ کو اور آ جاتی ہے نیند

اف شب وعدہ میں اک ایسی بھی آتی ہے گھڑی

نیند سے ڈرتا ہوں میں اور مجھ سے ڈر جاتی ہے نیند

کیا بتاؤں نیند کا نیرؔ تمہیں لطف و کرم

خواب میں ان کے نئے انداز دکھلاتی ہے نیند