ku-ba-ku sahra-ba-sahra dar-ba-dar ki baat hai

kū-ba-kū sahrā-ba-sahrā dar-ba-dar kī baat hai

zindagī kyā hai ye rūdād-e-safar kī baat hai

kyā zarūrī hai har ik manzil ko ham manzil kaheñ

ye to apne apne andāz-e-nazar kī baat hai

vo to dīvāna thā ai dānishvaro phir kis liye

sab ke hoñToñ par usī āshufta-sar kī baat hai

hādsoñ ko ham-safar apnā jo samjhe rāh-rau

ye jahāñ us ke liye gard-e-safar kī baat hai

dāstāñ TuuTe hue shīshe kī kiije kyā raqam

shīsha se nāzuk ziyāda shīshagar kī baat hai

ham ne jhelī haiñ mohazzab zindagī kī saḳhtiyāñ

ham se pūchho is meñ kitne dard-e-sar kī baat hai

apne ghar meñ bhī sukūñ se aaj rahnā hai muhāl

chup raho sun legā koī apne ghar kī baat hai

dostoñ se mil ke ab 'nāshād' hotā hai gumāñ

mere andar bhī koī shāyad hunar kī baat hai

ku-ba-ku sahra-ba-sahra dar-ba-dar ki baat hai

zindagi kya hai ye rudad-e-safar ki baat hai

kya zaruri hai har ek manzil ko hum manzil kahen

ye to apne apne andaz-e-nazar ki baat hai

wo to diwana tha ai danishwaro phir kis liye

sab ke honTon par usi aashufta-sar ki baat hai

hadson ko ham-safar apna jo samjhe rah-rau

ye jahan us ke liye gard-e-safar ki baat hai

dastan TuTe hue shishe ki kije kya raqam

shisha se nazuk ziyaada shishagar ki baat hai

hum ne jheli hain mohazzab zindagi ki saKHtiyan

hum se puchho is mein kitne dard-e-sar ki baat hai

apne ghar mein bhi sukun se aaj rahna hai muhaal

chup raho sun lega koi apne ghar ki baat hai

doston se mil ke ab 'nashad' hota hai guman

mere andar bhi koi shayad hunar ki baat hai