ku-e-dushman se use chhup ke nikalte dekha

kū-e-dushman se use chhup ke nikalte dekhā

ham ne naqsh-e-qadam-e-yār ko chalte dekhā

haa.e kyā haal dam-e-vasl hamārā hogā

bosa lene meñ tumheñ rañg badalte dekhā

abr ban kar jo baras paḌne ko aayā vaa.iz

be-tarah ham ne ḳhum-e-mai ko ubalte dekhā

ye bhī piinā hai koī chaal hai ye bhī koī

har-qadam par unheñ sau baar sambhalte dekhā

yahī āñkheñ haiñ ki jin meñ nahīñ ab naam ko ashk

inhīñ āñkhoñ se kabhī ḳhuun ubalte dekhā

hashr ke roz na taab abr-e-karam ko aa.ī

mujh gunahgār ko jab dhuup meñ jalte dekhā

gesū-e-hūr kaho sabza-e-turbat kaisā

qabr-e-dushman se dhuāñ ham ne nikalte dekhā

kūcha-e-ishq meñ allāh re pā-mardī-e-dil

Thokareñ khā ke use ham ne sambhalte dekhā

ġhair ke ghar se jhijakte hue tum nikle the

rukte dekhā tumheñ phir chhup ke nikalte dekhā

dil meñ kyā jaan thī kyā qatra-e-ḳhūñ kī thī bisāt

malte dekhā use hāthoñ se masalte dekhā

phuul laale kā khilā thā ki shafaq shaam kī thī

vasl kī raat ko bhī rañg badalte dekhā

kabhī kuchh raat ga.e yā kabhī kuchh raat rahe

ham ne in parda-nashīnoñ ko nikalte dekhā

ḳhūn-e-dil par hai abas rashk tirī mehñdī ko

apnī hī aag meñ ham ne use jalte dekhā

dil-e-betāb thā yā aag kī chiñgārī thī

kis qadar jild unheñ pā-posh se malte dekhā

vaah kyā rañg hai kyā ḳhuub tabī.at hai 'riyāz'

ho zamīñ koī tumheñ phūlte-phalte dekhā

ku-e-dushman se use chhup ke nikalte dekha

hum ne naqsh-e-qadam-e-yar ko chalte dekha

hae kya haal dam-e-wasl hamara hoga

bosa lene mein tumhein rang badalte dekha

abr ban kar jo baras paDne ko aaya waiz

be-tarah hum ne KHum-e-mai ko ubalte dekha

ye bhi pina hai koi chaal hai ye bhi koi

har-qadam par unhen sau bar sambhalte dekha

yahi aankhen hain ki jin mein nahin ab nam ko ashk

inhin aankhon se kabhi KHun ubalte dekha

hashr ke roz na tab abr-e-karam ko aai

mujh gunahgar ko jab dhup mein jalte dekha

gesu-e-hur kaho sabza-e-turbat kaisa

qabr-e-dushman se dhuan hum ne nikalte dekha

kucha-e-ishq mein allah re pa-mardi-e-dil

Thokaren kha ke use hum ne sambhalte dekha

ghair ke ghar se jhijakte hue tum nikle the

rukte dekha tumhein phir chhup ke nikalte dekha

dil mein kya jaan thi kya qatra-e-KHun ki thi bisat

malte dekha use hathon se masalte dekha

phul lale ka khila tha ki shafaq sham ki thi

wasl ki raat ko bhi rang badalte dekha

kabhi kuchh raat gae ya kabhi kuchh raat rahe

hum ne in parda-nashinon ko nikalte dekha

KHun-e-dil par hai abas rashk teri mehndi ko

apni hi aag mein hum ne use jalte dekha

dil-e-betab tha ya aag ki chingari thi

kis qadar jild unhen pa-posh se malte dekha

wah kya rang hai kya KHub tabiat hai 'riyaz'

ho zamin koi tumhein phulte-phalte dekha