ku-e-jaanan mujhse hargiz itni begana na ho

kū-e-jānāñ mujh se hargiz itnī begāna na ho

ain mumkin hai ki phir terī taraf aanā na ho

ain mumkin hai ki dohrā.ūñ hadīs-e-dīgarāñ

aaj jo merī zabāñ par hai vo afsāna na ho

ain mumkin hai ki jā pahuñchūñ kisī mirrīḳh par

is zamīñ se koī rishta koī yārāna na ho

pīr-e-mai-ḳhāna ye mumkin hai ki merā jā-nashīñ

riñd ho par vāqif-e-ādāb-e-mai-ḳhāna na ho

tū mujhe farzāngī kā fan na sikhlā ai ḳhirad

ain mumkin hai ki mujh sā koī dīvāna na ho

ain mumkin hai ki maiñ tujh se bichhaḌ jaane ke ba.ad

aisā ban jā.ūñ ki ḳhud terī jise parvā na ho

ain mumkin hai ki terī be-ruḳhī ko dekh kar

maiñ vo kāfir huuñ jo mas.hūr-e-ruḳh-e-zebā na ho

soch mat ai dost tere ba.ad kyā hogā ye soch

ya.anī mere ba.ad phir mujh sā koī paidā na ho

phir na uTThe koī aarif merī vaz.a-e-ḳhās kā

aur mujh sā shā.ir-e-sarshār-o-hosh-afzā na ho

ya.anī mere ba.ad koī mard-e-hikmat-āfrīñ

manzar-e-hikmat pe aa.e aur farzāna na ho

mujh ko tark-e-dostī ke is qadar ta.ane na de

maiñ tirā dushman nazar aane lagūñ aisā na ho

phir kahe detā kahe detā kahe detā huuñ maiñ

kū-e-jānāñ mujh se hargiz itnī begāna na ho

ku-e-jaanan mujh se hargiz itni begana na ho

ain mumkin hai ki phir teri taraf aana na ho

ain mumkin hai ki dohraun hadis-e-digaran

aaj jo meri zaban par hai wo afsana na ho

ain mumkin hai ki ja pahunchun kisi mirriKH par

is zamin se koi rishta koi yarana na ho

pir-e-mai-KHana ye mumkin hai ki mera ja-nashin

rind ho par waqif-e-adab-e-mai-KHana na ho

tu mujhe farzangi ka fan na sikhla ai KHirad

ain mumkin hai ki mujh sa koi diwana na ho

ain mumkin hai ki main tujh se bichhaD jaane ke baad

aisa ban jaun ki KHud teri jise parwa na ho

ain mumkin hai ki teri be-ruKHi ko dekh kar

main wo kafir hun jo mashur-e-ruKH-e-zeba na ho

soch mat ai dost tere baad kya hoga ye soch

yani mere baad phir mujh sa koi paida na ho

phir na uTThe koi aarif meri waza-e-KHas ka

aur mujh sa shair-e-sarshaar-o-hosh-afza na ho

yani mere baad koi mard-e-hikmat-afrin

manzar-e-hikmat pe aae aur farzana na ho

mujh ko tark-e-dosti ke is qadar tane na de

main tera dushman nazar aane lagun aisa na ho

phir kahe deta kahe deta kahe deta hun main

ku-e-jaanan mujh se hargiz itni begana na ho