ku-e-qatil se jo guzrega bikhar jaega

kū-e-qātil se jo guzregā bikhar jā.egā

par yahāñ ḳhauf kise hai ki vo mar jā.egā

shahriyat ke jahāñ aa.iin se chhin jaa.eñ huqūq

aisī tarmīm se kyā mulk sañvar jā.egā

haq kī āvāz meñ āvāz milāte chaliye

kārvāñ baḌhtā rahegā ye jidhar jā.egā

chal rahe haiñ jo añdheroñ se muqābil ho kar

āḳhir-e-shab inheñ paiġhām-e-sahar jā.egā

aaj bhī us ko himāyat hai ḳhudā kī hāsil

ban ke mish.al jo sar-e-rāh-guzar jā.egā

jo jalā.eñge charāġhoñ ko lahū se apne

un ke hamrāh ujāloñ kā asar jā.egā

jo qadam uTThegā ahkām-e-haqīqat pe 'tarāz'

us kī manzil pe ye anvār-e-safar jā.egā

ku-e-qatil se jo guzrega bikhar jaega

par yahan KHauf kise hai ki wo mar jaega

shahriyat ke jahan aain se chhin jaen huquq

aisi tarmim se kya mulk sanwar jaega

haq ki aawaz mein aawaz milate chaliye

karwan baDhta rahega ye jidhar jaega

chal rahe hain jo andheron se muqabil ho kar

aaKHir-e-shab inhen paigham-e-sahar jaega

aaj bhi us ko himayat hai KHuda ki hasil

ban ke mishal jo sar-e-rah-guzar jaega

jo jalaenge charaghon ko lahu se apne

un ke hamrah ujalon ka asar jaega

jo qadam uTThega ahkaam-e-haqiqat pe 'taraaz'

us ki manzil pe ye anwar-e-safar jaega