kucha-e-dilbar mein main bulbul chaman mein mast hai

kūcha-e-dilbar meñ maiñ bulbul chaman meñ mast hai

har koī yaañ apne apne pairahan meñ mast hai

nashsha-e-daulat se mun.im pairahan meñ mast hai

mard-e-muflis hālat-e-ranj-o-mehan meñ mast hai

daur-e-gardūñ hai ḳhudāvandā ki ye daur-e-sharāb

dekhtā huuñ jis ko maiñ us anjuman meñ mast hai

aaj tak dekhā nahīñ in āñkhoñ ne rū-e-ḳhumār

kaun mujh sā gumbad-e-charḳh-e-kuhan meñ mast hai

gardish-e-chashm-e-ġhazālāñ gardish-e-sāġhar hai yaañ

ḳhush raheñ ahl-e-vatan dīvāna-pan meñ mast hai

hai jo hairān-e-safā.e-ruḳh halab meñ ā.īna

bū-e-zulf-e-yār se aahū ḳhutan meñ mast hai

ġhāfil o hushiyār haiñ us chashm-e-mai-gūñ ke ḳharāb

zinda zer-e-pairahan murda kafan meñ mast hai

ek sāġhar do jahāñ ke ġham ko karnā hai ġhalat

ai ḳhushā-tāle jo shaiḳh-o-barhaman meñ mast hai

vahshat-e-majnūñ-o-'ātish' meñ hai bas itnā hī farq

koī ban meñ mast hai koī vatan meñ mast hai

kucha-e-dilbar mein main bulbul chaman mein mast hai

har koi yan apne apne pairahan mein mast hai

nashsha-e-daulat se munim pairahan mein mast hai

mard-e-muflis haalat-e-ranj-o-mehan mein mast hai

daur-e-gardun hai KHudawanda ki ye daur-e-sharab

dekhta hun jis ko main us anjuman mein mast hai

aaj tak dekha nahin in aankhon ne ru-e-KHumar

kaun mujh sa gumbad-e-charKH-e-kuhan mein mast hai

gardish-e-chashm-e-ghazalan gardish-e-saghar hai yan

KHush rahen ahl-e-watan diwana-pan mein mast hai

hai jo hairan-e-safae-ruKH halab mein aaina

bu-e-zulf-e-yar se aahu KHutan mein mast hai

ghafil o hushiyar hain us chashm-e-mai-gun ke KHarab

zinda zer-e-pairahan murda kafan mein mast hai

ek saghar do jahan ke gham ko karna hai ghalat

ai KHusha-tale jo shaiKH-o-barhaman mein mast hai

wahshat-e-majnun-o-'atish' mein hai bas itna hi farq

koi ban mein mast hai koi watan mein mast hai