kucha-e-rang-e-malamat ke sab aasar ke sath

kūcha-e-rañg-e-malāmat ke sab āsār ke saath

aa ga.e dasht meñ ham bhī dar-o-dīvār ke saath

dasht-e-vahshat ne mire noch lī shab kī poshāk

toḌ dī paañv kī zanjīr bhī jhankār ke saath

merī tanhā.ī meñ ik vajd kī kaifiyyat hai

raqs kartā huuñ maiñ ik ālam-e-asrār ke saath

gūñjtā hai mire siine ke nihāñ-ḳhāne meñ

saañs letā hai koī vaqt kī raftār ke saath

kaaT Dālūñgā maiñ ḳhud apnī anā kī shah-e-rag

aaj ḳhud apne muqābil huuñ maiñ talvār ke saath

din to ḳhvāboñ se ulajhne meñ guzar jaatā hai

raat kaT jaatī hai ārām se āzār ke saath

jis ko duniyā ne bhī bekār samajh rakkhā thā

maiñ ne sīkhā hai bahut kuchh isī bekār ke saath

nāznīnān-e-ḳhush-andāam kā shā.ir huuñ maiñ

baiTh ke dekh kabhī 'shāhid'-e-tarrār ke saath

kucha-e-rang-e-malamat ke sab aasar ke sath

aa gae dasht mein hum bhi dar-o-diwar ke sath

dasht-e-wahshat ne mere noch li shab ki poshak

toD di panw ki zanjir bhi jhankar ke sath

meri tanhai mein ek wajd ki kaifiyyat hai

raqs karta hun main ek aalam-e-asrar ke sath

gunjta hai mere sine ke nihan-KHane mein

sans leta hai koi waqt ki raftar ke sath

kaT Dalunga main KHud apni ana ki shah-e-rag

aaj KHud apne muqabil hun main talwar ke sath

din to KHwabon se ulajhne mein guzar jata hai

raat kaT jati hai aaram se aazar ke sath

jis ko duniya ne bhi bekar samajh rakkha tha

main ne sikha hai bahut kuchh isi bekar ke sath

nazninan-e-KHush-andaam ka shair hun main

baiTh ke dekh kabhi 'shahid'-e-tarrar ke sath